Comentamos La Cena

O club de lectura de adultos do CPI de Mondariz, formado por nais, pais e profesorado do centro reuniuse na cafetería Gonixul para celebrar a súa primeira “andaina” de tertulias e comentar La cena, de Herman Koch.

O libro presenta unha  estrutura narrativa orixinal e que lle dá nome ao título pois todos os feitos se desenvolven ao redor dunha cea e as partes da novela veñen ditaminadas polo aperitivo, os entrantes, o segundo prato, as sobremesas, a dixestión e a propina. Cada unha das partes está introducida por unha detallada descrición dos pratos nas que o autor fai alarde dun enxeñoso sarcasmo cara os restaurantes de “postureo e falso-luxo” así coma unha crítica da sociedade actual na que se ven retratadas as relacións de pais e nais cos fillos, a clase social acomodada, a política, etc. Inda que o marco da acción se sitúa nos Países Baixos, a crítica é extensible a toda Europa.

A novela está narrada en primeira persoa por un dos personaxes protagonistas, Paul; un profesor de Historia en baixa laboral por enfermidade que ao longo da novela semella ser unha persoa completamente diferente e que consegue enganar o lector case ata o final. Na cea Paul está acompañado pola súa muller Claire, outro personaxe que vai despistar moito o lector; o seu irmán Serge, un destacado político holandés que aspira á presidencia do país; e a muller deste, Babette.

A historia que se nos retrata na obra é dura e moi cruel, asistimos a un violento suceso que protagonizan uns adolescentes fillos das parellas que se atopan á mesa e que nos levan a formular grandes preguntas: Ata onde se pode chegar polo amor a un fillo? Onde están os límites? O fin xustifica os medios?

Un libro que, desde logo, non deixou indiferente a ninguén despois da súa lectura e que nos levou a reflexionar sobre a sociedade na que vivimos e cara onde está a camiñar o ser humano. Na tertulia deunos pé a tratar temas como o valor da educación, a importancia do diálogo nas familias e na escola, como actuariamos nunha situación límite se foramos eses pais/nais, a violencia de certos personaxes, etc.

Para deixar bo sabor de boca, María tróuxonos un recorte de xornal que atopou no que se relata precisamente o feito contrario do que acontece no libro: rapaces que, neste inverno, repartiron chocolate e compaña ás persoas que durmen nos caixeiros. Deixámosvos o enlace dos artigos.

E se aínda seguides con ganas de ler máis deste autor e coñecer a sociedade holandesa, que non deixa de ser unha mostra da europea, recomendámosvos outro título, se cabe aínda máis controvertido.

Vémonos de novo o mércores 19 de febreiro, para comentar o próximo libro. Continuaremos traballando valores, e situacións que se poden vivir na adolescencia. Intrigados? Aquí vos deixamos a imaxe da portada.